ZOTI ËSHTË I PARI, SHQIPËRIA MBI TË GJITHA

Komb ‘i ri’ apo Pari e re ?

Gjatë ditëve të fundit, në media është prezatuar libri i filozofit Hysamedin Feraj, me titull ” E pafilozofuara”, ku autori flet për problemet e shqiptarëve, politikën e historinë. Ndër të tjera autori thotë :

-“Në 2002, gati dhjetë vjet përpara unë i pata vendos një program vetës, programi ishte të ndërrohet populli shqiptar, jo politikanët. Vazhdimisht ishte shqetësimi i gjithë shoqërisë si të ndërrojmë këta politikanë që na morën në qafë. Erdha në një konstatim, se e vetmja mënyrë, për t’i ndërruar këta politikanë është të ndërrohet populli shqiptar, sepse pa u ndërruar populli nuk ndërrohen politikanët. Në masë të madhe siç është populli janë edhe politikanët”

Padyshim autori, si filozof i njohur, duhet ta ketë argumentuar më së miri tezën në librin e tij, ç’ka do të debatohet më tej, kur libri të jetë në bibliotekat e shqiptarëve të interesuar, megjithatë në parim mund të shtrohen disa vërejtje.

Duke qartë që teza në vetvete nuk përfaqëson ndonjë risi, sepse është rrjedhojë e drejtpërdrejtë e shprehjes së famshme, se çdo popull ka qeverinë që meriton. Që këtu buron teza, se çdo ndryshim i qeverisë, i politikanëve ose parisë së vendit është pasojë e ndryshimit të popullit. E marrë në vlerë absolute vërtetësia e tezës është e pakontestueshme, mirëpo realiteti nuk e njeh absoluten, prandaj edhe vlera e pohimit është relative.

Autori e pranon haptazi, se dëshiron të ndryshojë realitetin, duke u futur tek kategoria e filozofëve, të cilët e shohin filozofinë si mjet që shnderron realitetin e jo si mjet që e shpjegon atë. Kjo shkollë i ka rrënjët tek Marksi,  i cili është edhe i pari filozof i shndërrimit shoqëror. Pa dashur të bie në rremësinë ose rrejshmërinë logjike të  ‘ad Hitlerum’ (Hitleri hante vezë, prandaj kush ha vezë është hitlerian), nuk mund të mos vërej së filozofët, që mëtojnë të shndërrojnë popujt e kombet, në përgjithësi i përkasin rrymës marksiste të mendimit.

Për më tepër, që doktrina e popullit të ri, kombit të ri, gjithë shqiptarëve u kujton doktrinën e marrë komuniste të ‘Njeriut të Ri’, e cila dëmtoi breza të tërë dhe pasojat  i vuajmë ende sot, për të mos thënë se ka gjasa të përcillen edhe në brezat e ardhshëm.

Vërejtje tjetër, që lind vetvetiu, është se po të ketij populli janë edhe figurat e shquara, që nga lashtësia e hershme e deri në ditët tona, prandaj ky komb ka të këqijat e të mirat e veta, ashtu si çdo komb tjetër. Të hedhësh poshtë këtë komb, të sprovuar në mijëra vjet histori, për një komb të ri, të përfytyruar, me vlera të thurura në teori, duket jo vetëm utopike, por edhe dëmprurëse deri në keqdashëse.

Nga ana tjetër, për shkak të vështirësisë, filozofia nuk përfaqëson mjetin popullor të përhapjes së mendimit, dmth një  filozof nuk vjen dot kurrë drejtpërdrejt tek populli i thjeshtë, por vetëm nëpërmjet parisë ( kulturore apo politike), prandaj filozofi, në praktikë, nuk flet kurrë  për popullin e thjeshtë, por flet për paritë, nga ku edhe logjika të çon në perfundimin, se filozofia nuk mund të shndërrojë kurrë popullin, pa shndërruar më parë paritë e tij, pa u përvetësuar më parë nga to dhe pa u përhapur prej tyre.

Atëherë është kundër logjikës të pretendohet, se filozofi mund të shndërrojë popullin e nëpërmjet popullit të shndërrojë edhe politikanët ose parinë politike. Përndryshe, logjika thotë se filozofia mund të ndikojë në shndërrimin e parisë dhe paria të ndikojë në shndërrimin e popullit. Në fakt edhe vetë komunizmi, dihet që u përhap nga një pjesë e parisë borgjeze drejt klasës punëtore dhe jo nga klasa punëtore.

Prandaj, që këtu del në pah roli kyç i parisë , jo vetëm në përcaktimin e ruajtjen e rendit shoqëror, por edhe nëse mëtohet ndryshimi i këtij rendi. Janë politikanët ata që duhen ndryshuar, që të ndryshojë edhe populli dhe jo e kundërta që rreket të vërtetojë autori. Në këtë pike vlen të theksohet se prej kohësh, Shinasi Rama, profesor i Universitetit të New York-ut, për shkenca politike, ka vënë gishtin tek Paria, që ai e cilëson ‘e Tiranës’, si përcaktor vendimtar në fatet e vendit dhe si pari, që duhet zëvendësuar.

Rëndësinë kyçe të Parisë e ka përmbledhur ekonomisti e politologu i famshëm italian Pareto (1848 – 1923) në shprehjen ‘Historia është një varrezë aristokratësh’, prandaj sado të flitet për historinë e kombit apo të popullit, në thelb kemi një histori, ku personazhet kyç janë pjesë e parive të kohëve dhe se vendimet e marra (e vetë gjykimi i historisë), do të ishte e cekët, sikur të gjykoheshin në përgjithësi si të popullit, pa marrë parasysh interesat e klasave politike ose të parive (komunistët e kishin zakon që çdo vendim komunist, ta paraqisnin si vendim i popullit, edhe kur nuk ishin në pushtet) .

Pa u futur thellë në specifikat e ngjarjeve madhore historike, që kanë kushtëzuar historinë tonë, të tashmen tonë e që kanë paracaktuar në disa drejtime edhe të ardhmen tonë, që nga superfuqitë që na kanë pushtuar (Roma, Bizanti, Turqia) e deri tek konflikti i kulturave, asaj perëndimore e asaj lindore (fillimisht katolikë-ortodoksë, më vonë të krishterë – myslymane), nuk mund të mos pahnxirret si vendimtar edhe fakti që kombet e vogla janë të detyruara ‘të gjejnë një kujdestar’, një Fuqi të Madhe, dhe t’i japin të drejtë të ndërhyjë në vetë qeverisjen e brendshme, në përzgjedhjen e elementeve që duhet të qeverisin, nga ku arrihet lehtë në perfundimin se më shumë sesa paria si pasqyrë e popullit, për shkak të konjukturave ndërkombetare, kemi pasur vazhdimisht një pari, e cila respekton ose pasqyron konjukturat ndërkombëtare.

Natyrisht, të qenit përherë subjekt i tjerëve, na ka privuar nga të qenit sovrane dhe marrja përsipër e detyrave dhe përgjegjësive në mënyrë të pavarur, prej nga edhe fajet, që ne ia mveshim vetes apo të qenit tonë në këtë mënyrë që paraqitemi, në fakt janë për t’iu mveshur në një masë të madhe pikërisht të tjerëve, subjekteve të huaja të cilat kanë ndikuar në historinë e të tashmen tonë. Kjo nuk përfaqëson ‘hedhjen e fajit’ e mospranimin e tij, por të vërtetën historike jo thjesht të shqiptarëve, por të të gjithë popujve të vegjël e historikisht të pushtuar apo të gjendur brenda konjukturave ndërkombetare të pafavorshme.

Shquarja e problemit shqiptar tek paritë qeverisëse dhe e mekanizmit ndryshues, si shndërrim i parive, ashtu sikundër Shinasi Rama, na jep edhe mundësinë që të mendojmë e veprojmë se si mund të ndryshojë gjendja, pa rënë në gabimin e radhës, i cili do t’i kushtonte dekada të tjera eksperimentimi, një kombi  të ndëshkuar nga historia, si kombi yne i përvuajtur.

Nuk ka nevojë ky komb, që të shndërrohet nëpër tryeza mendimtarësh në një ‘të ri’, ky komb ka nevojë të degjohet, ti ringjallet limfa jetësore dhe sidomos ‘të përvetësojë’ më në fund edhe shtetin (shtetet), që ky të jetë shteti i shqiptarëve dhe jo shteti i interesave private, shqiptare apo të huaja, sikundër ka qenë për 100 vjet. Kombi yne ka nevojë për pari të reja, politike e kulturore, pari kombdashëse, jo pari që nuk shohin përtej oborrit vetjak, si të sotmet.

Do guxoja që edhe detyra e mendimtarëve që e duan këtë komb, duhet të jetë e pandryshuar nga ajo që caktoi  Rilindja, pra çdo shqiptar të edukohet me frymë kombëtare, të studiojë e punojë, duke pasur parasysh jo vetëm interesin legjitim vetjak, por edhe interesin kombëtar, sepse një gjë është e sigurtë, nëse është mirë Shqipëria, atëherë do të jenë mirë edhe shqiptarët, biles edhe ata shqiptarë ose shqipfolës, që nuk i duan të mirën vendit.

Ledjan Prifti

 

10 KOMENTE

anonimus

25/12/2011

arrow

Nuk e kuptoj se si autori i ketij shkrimi ben nje kritike per nje veper te cilen nuk e ka lexuar?

Ledjan

25/12/2011

arrow

Përshëndetje!

Në fakt nuk është kritikë për veprën, por disa vërejtje në parim, gjithnjë në mirëbesim se prezantimi i librit i qëndron në parim besnik veprës,dmth nuk prezantohet fiku për ananas.

Gëzuar Festat!
L. Prifti

anonimus

26/12/2011

arrow

Ne rregull, zotri Prifti por shtrohet pyetja se pse shpetoheni te beni keto “verejtje” ne “parim” para se ta lexoni vepren ne fjale? Mendoj, se kjo eshte pyetja thelbesore pa hyre fare ne pasaktesite e ndryshme mbi te cilat ju ndertoni argumentin tuaj. Atehere edhe une po bej disa verejtje ne “parim” pa ju njofur mire. Ne baze te disa fjaleve qe qarrkullojne ne Prishtine them qe deshira juaj per te anatemuar zotin Feraj behet me qellim per te cuar pak uje Levizjes per Bashkim ne Kosove, me gjasa partnerit tuaj lokal ne zgjedhjet e ardhshme ne Kosove. Per ndryshe ju ndiqni logjiken ‘ad Hitlerum’ edhe pse mundoheni te mohoni ate. Sepse kategorine e mendimit filozofik i llojit te cilin ju mundoheni ti ja vishni zotit Feraj haset edhe para Marksit, per shembull te Hegeli. Edhe pse mendoj qe ju beni nje keqinterpretim te vepres ne fjale te cilen une sepaku kam patur mundesi ta lexoj kalimthi. Juve citoni ne menyre simplistike fjalet e Ferajt gjate promovimit te librit. Nese do te benim mekatin ta pershkruajm librin e cekur me disa fjale atehere mund te thuhet qe libri eshte me shume nje sere pyetjesh qe cojne lexuesin te reflektoje per ate se pse ne jemi si jemi si komb sesa nje recete per te “ndryshuar” popullin. Por ti kthehemi logjikes ‘ad Hitlerum’ . Per mua eshte mjaft e e dhimbshme kur shof se si edhe 20 vjet nga renja e komunizmit njerezit akoma etiketohen si komunist apo jo, ne kete rast duke permendur Marksin. Kjo ma kujton pak historine biblike te hazretit Musa i cili pasi i cliroj cifutet nga roberia shpenzoj edhe 40 vjet te tjera duke qendruar ne shkretetire para se te hynin ne token e premtuar. Dhe nje interpretim se pse ndodhi keshtu eshte qe ai priste te vdiste gjenerata qe ishte ritur ne roberi, te cilet nuk dinin si te jetonin ne liri. Me kete logjike them qe do duhet te kaloje akoma kohe para se njerezit ne Shqiperi te mund te lirohen nga trashegimia komuniste direkte apo indirekte ne mentalitetin e tyre. Sepse, ndonjehere me duket sikur njerezve ne Shqiperi i ka ngelur filmi ne 1945-en dhe akoma mendojne qe po luftojne partizanet me ballistet.

Ledjan

27/12/2011

arrow

Me vjen keq i nderuar, që po përpiqeni të krijoni një stuhi në një gotë ujë.

Nëse do të dëshiroja, mund të kisha kryer një sulm ad personam, duke përmendur qëndrimet dashakeqe të autorit rreth Skënderbeut e Kadaresë, ose faktin që opinionet e tij gjenden sa në faqe komunistësh si Saktivista, aq edhe në faqe islamikësh.

Vërejtjet e mia dashamirëse ju i quani anatemim, kur në thelb vërejtja e parë përqendrohet tek ‘mbetje’ të filozofisë marksiste ( filozofia e shndërrimit shoqëror, nuk mund t’i mvishet kurrsesi Hegelit) në mendimin e autorit , vërejtja e dytë tek njëfarë populizmi, që nuk i shkon përshtat rolit të filozofisë, kurse e treta tek gabimi thelbësor, sipas meje, ku historia shihet ekskluzivisht si e lidhur me popullin në kuptimin e kombit; shihet si e njëtrajtshme(pushtim), me pak përjashtime, e po ashtu nuk dallohen interesat e popullit të thjeshtë e të parisë.

Një filozofi e historisë me difekte në njohjen historiografike, mund të vlejë kur kryhet në këndvështrimin metafizik të Hajdegerit dhe ngel në nivelin metafizik, por jo kur mëton të gërshetohet me filozofinë politike e më tej të zbresë drejtpërdrejt në terrenin e politikëbërjes.

Po kështu autori kryen gabime themelore në ndërtimin e pyetjeve, si psh pse kemi qenë 2000 vjet të pushtuar, kur historiografia na thotë që territore të gjëra malore kanë qenë pandërprerë të vetëqeverisura, ka pasur mungesë totale të administratave të huaja, pra nuk kanë gëzuar sovranitetin (pavarësinë), por kanë qenë gjithnjë të vetëqeverisura (autonome).

Përsa i përket vërejtjeve tuaja, ato janë thjesht fantazi, në kam ujë për të çuar gjëkundi, dua ta çoj në mullirin e nacionalizmit shqiptar dhe të bashkimit të organizatave shoqërore e politike me ideal patriotik, e aspak në përleshjet për vota mes patriotëve. Kjo mund të quhet edhe përgjigja e pyetjes suaj nistore, të cilën e quani thelbësore.
Përzierja e neomarksistëve në punët e nacionalizmit shqiptar është e dëmshme, sikundër gjatë L2B, kur në emër të Atdheut, komunistët ( që s’kanë lidhje fare me koncepte si kombi, atdheu) çuan shqiptarët në vëllavrasje e si në rastin e Safet Butkës, në vetëvrasje.

Vetëvendosja ka promovuar neomarksistë si Agon Hamza, bashkëpunon me komunistët në Shqipëri, kam frikë se mos bëhet si Fronti Nacionalçlirimtar i dikurshëm.

    anonimus

    27/12/2011

    arrow

    Zotri prifti, e shikoj qe insistoni te mereni me etiketime, por kjo nuk eshte asgje tjeter vec se mungese e argumentit.
    Jemi mesuar me kete cirk te sulmeve personale politike, dukuri e vecante per Shqiperine dhe per fat te keq nje nga eksportet e pakta qe po vine ne kete ane te kufirit. Por kjo eshte puna tuaj dhe ju qofte ne nderin tuaj, ajo qe me pengon mua eshte qe me detyroni te behem avokat I dikujt tjeter qofte kjo Hysamedin Ferajt, apo Levizjes Vetevendosje. Sa per Ferajn, mund te flas vetem duke u bazuar ne ate qe ka bere dhe ka shkruar. Dhe me sa e njoh une ai shkruan dhe vepron ashtu si mendon. Keshtu qe do tju kisha sfiduar te me gjeni shkrimet e tij ku ai propagandon komunizmin. Kjo eshte edhe pak qesharake kur flasim per nje person qe ka dale hapur kunder komunizmit ne kohen kur Jugosllavia ishte fuqi ushtarake, mos haroni qe zoti Feraj eshte pjesmares ne demonstratat studentore te 81-shit dhe I perndjekur nga UDB-ja. Per dallim te Kadarese, qe gezonte te gjitha te mirat e “bllokut” apo jo? Pastaj se cili forum I shperndan shkrimet e tij nuk eshte problem I Ferajt, une mund te diskutoj vetem per permbajtjen e tyre, por ai nuk mund te jete edhe Islamik edhe Komunist. Perndryshe, ska pse e fetishizojme aqe Kadarene sa qe nuk mundkemi ta kritikojme. Sa per Skenderbeun nuk e di per se e ke fjalen por me tingellon pak nacional romantike dhe populliste te meresh me te ne shekullin 21. Sa per Hegelin, fjalen e kisha per Idealizmin Hegelian si dhe per rolin e Historise ne mendimin e tij filozofik duke e krahasuar me idealizmin kombetar dhe historik ne kete rast te profesor Ferajt. Perndryshe, pasardhesit ( te influencuarit ) e Hegelit nga shume studiues ndahen ne ata te krahut te djathe dhe te majte (http://www.webcitation.org/5kwrKlUxv), ku ben pjese edhe Marxi. Edhe pse me vone qendrimet e Marxit dhe te Engelsit evulojne ne ate qe ne e njohim ne Materializem Historik.
    Sa per djemte e Vetevendojes, une kam respekt te madh per ta sepse ka me shume se 1 dekade qe sakrifikojne per kombin me jeten(2 te vrare), shum te plagosur, burgje, rahje, perjashtime nga puna, etj. Keta djema folen per bashkimin kombtar kur ishte tabu dhe nuk guxonte askush. Per me shume, eshte nje organizate serioze politike qe definohet nga manifesti I levizjes dhe programin politik dhe jo nga etiketat tuaja, te pushtetit ne Kosove, Levizjes per Bashkim (ne web-faqen e se ciles per cudi figurojne shkrime tuaja?) apo ambasadave te huaja. Agon Hamza nuk eshte antar I levizjes, me sa e di une pikerisht pershkak te mospajtimit te tij ideologjik me programin politik te levizjes. Shkrimet e Agonit ne webfaqen e Vetevendosjes kane te bejne ekskluzivisht me kundershtimin e tij ndaj administrimit nderkombtar ne Kosove dhe asgje tjeter. Nese ke dicka kunder me ato shkrime atehere thuaje? Perndryshe nuk mund tja maresh te drejten dikujt te shprehe mendimin e vet kur ka te drejte per dicka sepse qenka neomarksist. Nese e perdorim te njejten logjike atehere ne web faqen tuaj gjenden shkrime te historianit Pellumb Xhufi ( http://www.aleancakuqezi.it/2011/lajme/xhufi-pyetja-per-etnine-anti-kushtetuese/ ) I cili flet kunder regjistrimit etnik ne Shqipri, qe eshte ne rregull. Por I njejti person debatonte me profesor Ferajn duke u shprehur kunder bashkimit kombetar ne emisionin Shqip ne Top-Channel (http://www.youtube.com/watch?v=5vf_v_kjlMI). A eshe Aleanca Kuq e Zi kunder bashkimit kombetar? Keshtu qe gjithashtu te sfidoj te me tregosh se si po u promovuaka Agon Hamza nga Vetevendosja?
    Pastaj se si gjen lidhje ndermjet frontit nacional clirimtar, internacionalizmit socialist qe ishte kunder ndarjeve ne baza nacionale dhe qe e la Kosoven ne Jugosllavi dhe nje organizate qe perpiqet pikerisht per te kunderten, pra bashkimin kombetar I tejkalon aftesite e logjikes time mendore.
    Por per dallim nga Vetevendosja, shtrohet pyetja se kush eshte Aleanca Kuq e Zi? Cka keni bere ju per bashkimin kombetar, cili eshte angazhimi juaj konkret apo sakrifice personale e antareve tuaj? Se pari nuk e di se si tju definoj, nuk keni asnje dokument qe tregon per cka qendroni. Nuk keni hedhur ne leter asnje fjali serioze qe te shpalose mendimin tuaj politik.
    Nuk keni bere asgje pervec video spote muzikore e shfaqe flamujsh kombtar, nje pamje patetike nacional romantike. Nuk eshte asgje tjeter vec se shfrytezim i nje ringjallje te identitetit kombetar qe po ndodh paksa me vonese do te thosha, ne Shqipri te gjeneratat me te reja. Eshte mire qe me ne fund e kuptuat se eshte mire me qene Shqiptar e jo Grek, Itallian, Anglez apo qofte edhe Amerikan, po tani c’te bejme ne te tjeret qe po themi kete gje me dekada. Ku ishte Kreshniku para 10 apo 5 vjet? Nuk kam lexuar dicka prej tij ne lidhje me bashkimin kombetar. Ndoshta ju do mund te me ndihmonit me ndonje link te ndonje shkrimi nga ai? Pershembull, ka disa persona edhe ne Shqipri si Adri Nurellari qe sepaku deklarativisht edhe hapur flasin per bashkimin kombtar keto vitet e fundit. Po Kreshniku prej nga na doli? A mund te me gjesh disa shkrime prej dikujt ne udheheqesine e Aleances tuaj ku angazhohet per kete gje e qe nuk daton me larg se 1 vit?
    Tani e dime qe vitin tjeter Kreshniku do mbetet pa pune, por kjo nuk do te thote qe duhen keqperdorur keta te ri,e qe per fat te keq kur kjo fushate propagandistike( e tipit “let’s feel good, let’s do it, yes we can”) te mare fund do te sjelle vetem nje zhgenjim, do te thosha vdekjeprures per angazhimin serioz kombetar. Qe do ta beje kete angazhim te duket patetik e romantic e do na ktheje perseri ne kosmopolitanizmin e famshem te shqiptareve te shqiprise.

Ledjan

28/12/2011

arrow

Nuk e kuptoj përse vërejtjet e mia dashamirëse vazhdoni t’i merrni si kritikë personale ndaj dikujt ?
I vetmi shpjegim që mund t’i jap është se doni të legjitimoni mësymjet tuaja dialektike dhe mllefin ndaj Aleancës KuqeZi e z.Kreshnik Spahiu. Në fakt, nuk shoh sesi mund të krijohet ndonjë përplasje dialektike mes organizatave patriotike, maksimumi mund të ketë disa mospërputhje, të cilat me anë të vërejtjeve dashamirëse e konstruktive mund të limohen, sheshohen, në emër të bashkëpunimit kombëtar.
Kemi përqasje të ndryshme, ndërshmëria dhe sinqeriteti i përqasjes time mund të vërtetohet lehtë, mjaft t’i hidhet një sy shkrimeve ku i afrohem kundërshtarit pikërisht me mësymje dialektike dhe ngjyresa të forta polemike.
Përqasja juaj, përkundrazi përfaqëson një kritikë destruktive, brutale e në caqet e të pacipës, që mund të vërehet lehtë tek paragjykimet dashakeqe që i hidhni me parashutë.

Ju nuk keni kuptuar ende se Aleanca KuqeZi, nuk përfaqëson një subjekt politik, i cili domosdoshmërisht duhet të ofrojë edhe program politik, por një lëvizje popullore që vepron në kuadër të shoqërisë civile e detyrimisht me objektiva të percaktuara e të kufizuara.

Për më tepër, në Shqipëri çdo lëvizje patriotike ka hasur në kundërshtimin e egër të establishmentit politik, aq sa mund të sjell shembullin e kabllogrameve të Wikileaks, ku gjendet e bardha më të zezë se z. Kreshnik Spahiu është kërcënuar me vdekje.

Këto lojërat tuaja, që shprehin edhe frymën e mbrapshtë në rrethet patriotike të Kosovës, në Shqiperi i kemi hequr nga 1912 – 1945, ku akuzat për patriotizëm të rremë, pseudopatriotizëm, përdorim të patriotizmit për qëllime personale, tradhtarë e kolltukofagë, ishin në rend të dites e përfundimi dihet, përçarje e brendshme, nga përfituan komunistët dhe instaluan diktaturën komuniste.

Ky është film i njohur, i cili nuk ka përse të luhet në Kosovë, dakort që jemi të gjithë shqiptarë e do bëjmë të njëjtat gabime kudo të banojmë, por ama nuk kemi përse të mos nisim e të mësojmë nga gabimet e njëri-tjetrit.

Për më tepër që me kutin tuaj, të ku ishe ti x apo y, jo vetëm do të mund të akuzoheshin figura të mëdha kombëtare që kane hyrë relativisht vonë në skenë, si Abdyl Frashëri, Cajupi, I. Qemali, por do të shkohej deri tek i Madhi Skënderbe, i cili do të akuzohej se pse deri në moshën 37 vjeçare luftonte për Turqinë.

Z. Kreshnik Spahiu, ka shpenzuar kohën e vet duke u marrë me probleme madhore të Shqipërisë, si korrupsioni e drejtësia, nuk ka qenë duke luajtur tavëll me pleqtë e lagjes.
Jo për gjë po nga mënyra si shkruani ju, duket sikur z. Spahiu ka qenë duke fërkuar barkun dhe befas u zgjua duke marrë përsipër përgjegjësi publike.

Ju përmendni z.Nurellari, por më së pari ju që e përmendet dhe vetë z. Nurellari, duhet të shpjegoni sesi pajtohet libertarianizmi me nacionalizmin politik, pastaj të shohim se në ç’kategori të sinqeritetit e ndershmërisë hyn aktivizimi i tij intelektual e politik. Jo për gjë, po se mos na del, që ndër shqiptarë të ngritur intelektualisht nuk është kuptuar ende abetarja e nacionalizmit politik.

Në këtë këndvështrim, pastërtisht ideor, vjen edhe vërejtja ime dashamirëse ndaj Vetëvendosjes për promovimin e Agon Hamza dhe bashkëpunimit të hapur me komunistët e Saktivistës, apo frika e njëfarë replikimi të Frontit Nacionalçlirimtar, sepse të veprosh në emër të nacionalizmit politik do të thotë edhe me qenë i kujdesshëm se kë promovon apo me kë bashkëpunon.

Sa për z. Xhufi, në fakt tek ai emision, flet si historian e diplomat, i cili i njeh kohët e gjata të diplomacisë dhe vështirësitë reale të një bashkimi, jo se është kundër bashkimit.
Mjafton që të përmend se psh Greqia e krijuar si shtet më 1830, i mori ishuj e Dodekanezit vetëm në 1945, ose Kretën më 1913. Duhet edhe durim e gjykim mendjeftohtë, sepse status_quo-të nuk janë aq të lehta për tu prishur, duhet të krijohet edhe një gjendje e favorshme ndërkombëtare për të realizuar bashkimin, nuk mjafton vetëm vullneti kombëtar.

Të jeni të sigurtë se stafi i kësaj faqeje, nuk ka për të përzgjedhur asnjëherë shkrime e persona të gabuar.

Ndërsa përsa i përket Skënderbeut e Kadaresë, më vjen keq por nuk pajtohem asnjë grimë me qëndrimin tuaj, sepse i pari përfaqëson shtyllën e shqiptarisë, kurse i dyti shtyllën e letersisë. Kush merret me rrëzimin e shtyllave, me apo pa dashje, shkakton rrëzimin e ngrehinës shqiptare.

    anonimus

    05/01/2012

    arrow

    Nuk kam mllef ndaj z.Kreshnik Spahiu, mllefin ma shkaktoj shkrimi tuaj dhe replika tuaj e dyte sepse kam zero tolerance ndaj etiketave personale ne politike. Medoj qe populli ne Shqiperi ka vuajtur mjaft nga Enveri, “armiqte e partise” dhe “imperialistet” e Amerikes qe i shpikte. Tani s’kemi nevoje ti zevendsojme me komunistet apo “marksistet” e ri. Une nuk thashe se a eshte apo jo pseudo patriot, por ju nuk mund te ma hiqni te drejten ta shikoj me nje doze mosbesimi dhe te bej disa pyetje sepse eshte figure publike kohe te gjate dhe nuk eshte mare me kete ceshtje. Keshtu qe i mbetet atij per tu deshmuar.
    Nuk kam mllef as ndaj AKQZ por kam verejtje serioze ndaj sjelljes tuaj sikur “historia” ka filluar me ju. Ti flet per bashkpunim te organizatave patriotike por haron qe tash me ka kohe qe egziston rrjeti i organizatave shqiptare. Ndoshta mund te keni verejte per funksiomin e tyre por ne vend qe te kontriboni ini ju qe po krijoni mekanima paralele dhe ferkime te pa nevojshme.

    Pastaj pse mos bashkpunojne me Saktivistat? Nuk di une kush eshte ai komunist te cilit po i referoheni ju? Nese i rreferoheni te majtes atehere perseri po beni etiketime dhe krijoni percarje qe do i kuptoja nese i thoshte nje person i rendomte por jo edhe nje intelektual.
    Gjysma e botes quhet e majte nga Amerika e deri ne Europe. Ska pse te perjashtohet cilido patriot sepse eshte me bindje te majta.
    Mendoj qe bota ka ndryshuar shume qe nga shekulli i 19te dhe ndarja e majte e djathe ne kuptimin e vjeter te fjales nuk ka shume kuptim. Most i perseritim gabimet historike.
    Kur ishte Shqipria shtet komunist nuk dinte te gjykonte dhe analizonte marksizmin e te zgjidhte c’ka eshte e mire e c’ka e keqe dhe perfunduat me komuniste se Ruset. Tani po na ndodh e kunderta gje dhe po behemi me kapitaliste se Amerikanet me politikat neoliberale (psh: taksa e sheshte) qe po aplikohen vetem ne Shqipri, Kosove e Cile.
    Se fundi, per ate qe the se AKQZ eshte organizate e shoqerise civile, te jem i bute po them qe nuk pajtohem me ty. Qenja njerzore eshte politike, kjo na dallon nga kafsha e qe eshte thene qe nga koha e Aristotelit. Gjithcka eshte politike dhe ideologji. Mund te jesh politik por mos te synosh udheheqjen e shtetit, mund te kerkosh te ndalohet importi i plehrave, te sillet ndonje ligj, etj, etj, por kjo nuk eshte menyra se si realizohet bashkimi kombetar. Per ta realizuar bashkimin kombtar duhet ta merni udheheqejen e shtetit sepse Saliu e Rama nuk e bejne. E nese e beni kete do ta kuptoni qe njerezit nuk ushqehen me ajer por duan pune dhe mirqenje shoqerore. Dhe per ta aritur kete mund te beheni fundamentaliste te djathte ose te majte ose te merni ate qe ju konvenon nga te dyja anet por qendrim do duhet te mbani.

Ledjan

05/01/2012

arrow

Më vjen keq që vazhdoni të këmbëngulni se po etiketoj ndokënd.

Kur fola për ‘mbetje’ të filozofisë marksiste tek teoria e shndërrimit, transformimit shoqëror, të cilën ju ia mvishni gabimisht Hegelit, nuk bëra ndonjë etiketim ndaj z. Feraj , përkundrazi mund të citoj vetë Marksin në ”Teza rreth Feuerbach-ut”:

-Filozofët deri më tash, veçse kanë interpretuar botën në mënyra të ndryshme, tani bëhet fjalë me e transformue (të transformohet, shndërrohet ).

Këtë fraze e kanë gdhendur edhe tek varri i tij.

Besoj se jeni dakort me mua, që o Marksi o ju, nuk e keni studiuar mirë Hegelin, perderisa keni mendim krejt të kundërt.

Përndyshe filozofia e historisë ku historia shihet si udhëtim drejt lirisë, patjetër i takon Hegelit dhe vërtet përshkon mendimin e z. Feraj (të paktën tek videoja e prezantimit të librit). Por kjo nuk do të thotë që filozofia e shndërrimit, transformimit, praxis, nuk është këndvështrimi marksist i filozofisë.

Përsa i përket asaj çka ju quani ‘etiketim’ si komunist për Agon Hamza apo të rinjtë e Saktivistës, me të cilët bashkëpunon prej vitesh Vetëvendosja, dmth Arbër Zaimi, Arbër Shtëmbari, Leart Kola etj, në fakt kjo është e vërteta e pastër, e kulluar, e mirëfilltë, sepse ata të parët thonë që janë komunistë.

Tani si t’i them Arbër Zaimit, kur vetëdeklarohet komunist dhe mbush faqet e mediave me ideologji komuniste, që nuk është komunist ? Kështu t’i them, nuk je komunist ?!

Me thënë të drejtën, mua më vjen keq që të rinj të përgatitur, si të sipërmendurit, në vend që t’ia kushtojnë kohën, dijet e mundin, çështjes kombëtare dhe ringritjes e fuqizimit të shtresës intelektuale patriotike, sikundër ka qenë para diktaturës komuniste, shoh që ia kushtojnë përhapjes së neomarksizmit. Më vjen dyfish keq, kur vërej se të tillë, të rinj, të përgatitur, aktivë e idealistë Shqipëria sot ka pak. Bash per këtë, ata vetë duhet ta kuptojnë se duke shpërdoruar vetveten, nuk i bëjnë dëm vetëm vetes së tyre, por edhe bashkësisë.

Nëse do të ndodhë që AK-ja të bashkepunojë me të sipërmendurit, atëherë të jeni të sigurtë që në Shqipëri do të rrudhnin buzët një masë e madhe përkrahësish të saj, duke filluar nga i nënshkruari.

‘Po’ bashkëpunimit kombëtar, por një ‘Jo’ të fortë përdorimit të atdhetarisë si trampolinë për ripërhapjen e ideologjisë komuniste, anipse kësaj radhe në petkun e ‘së majtës’.

Kombi është ide sociale, të paktën shqiptarët aty e kanë futur qysh në kohën e Kanunit, duke e quajtur ‘nji familje e hapët’ që përfshin krejt fiset shqiptare. Meqë Familje, vllazni e fis, janë institucione sociale, kuptohet lehtë që kombi shqiptarisht është menduar më së pari nga këndvështrimi social, mandej politik.

E majta ka në qendër socialen, prandaj ndodh që të ngatërrohen ideologjitë, ajo komuniste dhe ajo me strumbullar kombin, këtu në kete ngatërrim shoh qe ka rënë pre edhe Vetëvendosja. Biles do të thoja që ‘Vetëvendosja është e pavendosur’ në esencën e saj socio-politike.
Kudo lëvdohet për programin, boshtin, kauzën dhe koherencën e saj, por në fakt Vetëvendosja duhet të vendosë më së pari e përfundimisht, se cili koncept do t’i shërbejë si strumbullar ideologjik, ‘kombi’ apo ‘masat punëtore shqiptare’.

Në rast se zgjedh kombin, atëherë i duhet ta hedhë vështrimin larg, po shumë larg Saktivistës e Agon Hamzës, sepse ‘kombi’ nuk përbëhet vetëm nga ‘masat punëtore’ dhe është krejtësisht e papranueshme, që në shek 21, nacionalizmi politik të pajtohet apo aq më keq martohet me neomarksizmin, pavarësisht së janë përqasje në thelb sociale.

Gjithsesi këto janë çështje të brendshme të Vetevendosjes dhe nuk është qëllimi im të zgjatem në këtë pikë.

Përsa i përket Aleancës KuqeZi, kjo realisht vepron në kuadër të shoqërisë civile, jo sepse është regjistruar si e tillë dhe nuk ka ndërhyrë në çështje të mirëfillta të politikës së ditës, por sepse sikundër u shpreha më lart, në të menduarin mendimin shqiptar ose shqiptarisht, kombi më së pari është koncept social, mandej politik, kështu që rimëkëmbja e identitetit kombëtar së pari duhet të përmbushet në rrafshin shoqëror, mandej i vjen radha rrafshit politik. Jo se Aleanca KuqeZi detyrimisht do të kthehet në lëvizje të mirëfilltë politike, por nëse e përmbush misionin në rrafshin shoqëror atëherë nuk i ngelet veçse të kalojë në atë politik ose të shpërndahet.

Kendvështrimi juaj është edhe më i herët se Aristoteli, i takon Platonit, por për të politika ishte çdo gjë që i takon polisit dhe synon të mirën e përbashkët.
Legjitim e tërheqës si këndvështrim, por në kohët e sotme nuk është shumë realist, meqë sot politika shihet si mjedisi ku prodhohet vendimarrja.
Në këndvështrimin e sotëm, AK-ja nuk përfaqëson një levizje politike, meqë nuk synon të përfshihet në proçesin vendimarrës, më tej nuk i dihet, si levizje popullore që nën shtytjen shoqërore ka zgjeruar veprimtarinë e vet dy herë, ndoshta mund ta zgjerojë më tej e të përfshihet në politikë, por kjo është në dorën e përkrahësve e mbështetësve të saj.

p.s Historia natyrisht nuk ka filluar me AK-në, përkundrazi unë shpresoj që AK-ja të jetë ‘fundi i historisë’.
Nuk duhet harruar që nuk mund të ketë bashkim nëse shqiptarët e Shqipërisë nuk angazhohen për të, dhe këtë o e bën AK-ja o establishmenti politik ose ‘Paria e Tiranes’ sikundër e quan SH. Rama, s’ka për të lejuar më kurrë lindjen e një AK-je të dytë. Janë një sërë rrethanash që nuk përsëriten më, po kjo është çështje tjetër.

    anonimus

    05/01/2012

    arrow

    Ok, nuk kam ndermend ti hyj ketij diskutimi teorik mbi konceptin e politikes dhe as mbi filozofine e Marksit se nuk eshte vendi per tu bere ne nje forum. Mund ti biem rrotull kesaj gjeje gjithe diten, por ju po mundoheni te shendroni nje debat akademik ne nje ceshtje te politikes ditore.
    Sa per konceptin tuaj te “shoqerise civile”, mund te pajtohem me ju nese politiken e perkufizoni vetem ne procesin vendimarjes formal parlamentar. Ta shofim sa besnik do ti mbeteni kesaj qasje. Por nuk me dukeni shume bindes nga menyra se si e thuani dhe nga ajo qe tha Kreshnik Spahiu ne Vision Plus.

    Ndersa komenti juaj per ‘kombi’ apo ‘masat punëtore shqiptare’ sinqerisht me duket vetem loje fjalesh qe po beni.

    Neser kur te hyni ne politike do kuhet te mbani disa qendrime, dhe sic thone
    levizjet “Occypy” do duhet te percaktoheni vall ini per 1% apo 99% te “kombit”.
    Tani ti mund ta quash “klase puntore” apo si te duash (mos haro edhe mjeket, arsimtaret, profesoret, bujqit, etj, etj, pra shumica e popullit), por po e perseris kjo gjuhe eshte nje mbetje prej te kaluares qe po na mban peng te sotmen dhe te ardhmen.

    Sa i takon Vetevendosjes, une mendoj qe ajo eshte shume e qarte per sa i
    takon politikes ekonomike. Mendoj qe ne kete pike jeni ju te pa qarte se e shikoj qe
    ndoshta edhe nuk keni njohuri te mjaftueshtme per kete organizate.
    Eshte e thene shume qarte qe VV angazhohen per konceptin
    e shtetit zhvillimor. Nje filozofi ekonomike Kenziane, qe ne forma te ndryshme aplikohet ne Slloveni, Gjermani, Suedi dhe te “Tigrat” Azise.

    Per me shume, nuk e shikoj ku qendron kontradika ndermjet qendrimit te them
    “pro kombtar” dhe te paturit program ekonomik. Per kundrazi, une mendoj qe kjo
    ben kete kauze me serioze. Ju neser si mendoni ti ushqeni ata shtetas te
    ketij shteti kombtar, ushtrine e ketij shteti me cilat para do ta ndertoni, ose fundja
    fundit si mendoni ti krijoni rrethanat per bashkim kombtar me dy shtete te varfera
    dhe te korruptuara?

    Gjithashtu, me shume vullnet po mundohem te gjej ku thote Arber Zaimi qe eshte komunist. Ti e the kete, por ndoshta do te mund te me ndihmosh me ndonje reference?

    Sa per Agon Hamzen, dhe ato emrat e tjera qe i permende dhe qe i degjoj per here te pare, me duket qe po kapesh per nje dege dhe nuk do ta leshosh. Agon Hamza
    dhe ata te tjerit nuk jane pjese e VV ne asnje cilesi me sa e di une dhe nuk e di ne se po i bazon keto pohime?

フェラガモ 店舗

24/07/2013

arrow

Thank you for this blog. That’s all I can say. You most definitely have made this blog into something thats eye opening and important. You clearly know so much about. フェラガモ 店舗 http://ferragamo.moto-nari.com/

Lini një përgjigje

Emri juaj: (i domosdoshëm)

Emaili juaj: (i domosdoshëm)

Përgjigja juaj:

Posto përgjigjen